Área de Santiago

Moi preto da cidade, os municipios que a rodean ofrécennos rutas e atractivos suficientes para demorarnos na nosa visita. Damos paso a unha selección de monumentos, propostas de escapada natural e gastronómicas dalgúns destes lugares na contorna de Santiago.

Curro de Sabucedo, na Estrada

A área de influencia de Santiago, que abarca, co río Ulla por medio, unha vintena de municipios do sur da provincia da Coruña e do norte da de Pontevedra, ábrese ante nós con indubidables atractivos.

Paisaxe do río Ulla

Panorámica do Pico Sacro

Río Ulla en Catoira, camiño da ría de Arousa

Xardíns do Pazo de Oca, na Estrada

Fraga de Catasós (Lalín)

Limpar Buscar
Pechar

Un verdadeiro monumento é o Pico Sacro (Boqueixón). Un dos montes máis míticos de Galicia. A súa peculiar silueta elévase ben visible a 533 metros de altitude ao sueste da cidade.

A riqueza monumental de vilas históricas coma Padrón ou Melide, directamente vinculadas aos camiños de Santiago, o Pazo de Oca (A Estrada), cos seus impresionantes xardíns, ou o Pazo de Santa Cruz de Ribadulla (Vedra), onde destacan as súas camelias e as súas oliveiras centenarias, son algúns deles.

Un verdadeiro monumento é o Pico Sacro (Boqueixón). Un dos montes máis míticos de Galicia. A súa peculiar silueta elévase ben visible a 533 m de altitude ao sueste da cidade.

Desde o punto de vista natural, a área de Compostela regálanos varias fervenzas que se debuxan nos cursos fluviais próximos. Como a fervenza do Toxa (Silleda) ou a de Insua (Val do Dubra). Bosques únicos como a Fraga de Catasós (Lalín), con castiñeiros de máis de trinta metros de altura. Serras como a do Candán (na comarca do Deza), coa orografía de vellas montañas e grandes espazos abertos. Ou lugares máis recollidos, como a carballeira de Santa Minia (Brión) ou o Xardín Botánico (Padrón), entre outros de interese.

Canto á gastronomía da área de Compostela cómpre salientar os pementos de Padrón ou Herbón, os salmóns, troitas ou lampreas de tempada, e o cocido galego, que exalta a vila de Lalín cunha festa anual na semana anterior ao Entroido. Trátase dunha comarca moi gandeira, coa tenreira galega como emblema, e o galo (Vila de Cruces e O Pino celebran festas na súa honra). Destacar tamén os queixos cremosos da Denominación de Orixe Arzúa-Ulloa. Os doces tradicionais como os melindres de Melide, as filloas da Baña (á pedra) ou de Boqueixón, os amendoados ou rosquillas, e as augardentes do Ulla.

Finalmente, as novas comunicacións coa comarca do Barbanza e coa ría de Muros e Noia permítennos gozar tamén de praias (fluviais ou atlánticas) a menos de 30 minutos en coche. Lugares como a praia fluvial de Tapia, ou os próximos areais de Boa (Noia), Broña (serra de Outes) ou Esteiro (Muros), son algúns exemplos.

+ Información
Recursos
Ligazóns
Documentos