Camiño de Fisterra e Muxía

Etapa: Olveiroa - Muxía

  • Lonxitude 32,5 Km
  • Dificultade Alta
  • Duración estimada 8h 10min

Se se parte de Olveiroa é posible seguir ruta directamente a Muxía, tomando a bifurcación en Hospital. Esta variante diríxese a Dumbría, capital municipal, segue cara a San Martiño de Ozón e descende logo cara ao núcleo de Muxía, onde se atopa o albergue de peregrinos.

Olveiroa- Hospital

  • Lonxitude 4,9 Km
  • Dificultade Media
  • Duración estimada 1h 15min

Saímos de Olveiroa. O río Xallas flúe impresionante, abrigado entre a vexetación. Cruzamos o río Hospital, entramos no Logoso e logo na aldea de Hospital, un lugar que contou cun modesto hospital para peregrinos, hoxe desaparecido. Pouco despois aparece a rotonda que bifurca os camiños a Muxía e Fisterra.

Hospital- Dumbría

  • Lonxitude 5,8 Km
  • Dificultade Media
  • Duración estimada 1h 25min

Cruzamos polo Rego de Vao Salgueiro. Alternan asfalto e camiños rurais. Descendemos ata As Carizas, Rego de Cheo e subimos logo a Dumbría. Recíbenos a súa praza con hórreo, cruceiro e igrexa.