Idioma 
Vista aérea da praia de Samil
Camiño Portugués da Costa
Etapa: Baiona-Vigo
O Camiño regálanos fermosas mostras de arquitectura popular, históricos pazos e cruceiros coma os de Mallón e O Pereiro. E tamén a entrada á maior cidade de Galicia, Vigo, urbe dinámica e industrial.
Baiona- A Ramallosa
Ímonos despedindo de Baiona. De camiño á parroquia de Sabarís, pasamos ante a histórica e bela fonte do Pombal, seguimos pola rúa de Cristo Rei e alcanzamos Sabarís. Fronte ao mercado de abastos, cruzamos a ponte románica sobre o río Groba; máis adiante, a casa señorial de Cadaval, ata a bela ponte, tamén románica, da Ramallosa. Ten dez arcos e posiblemente se construíu sobre unha ponte romana. Aquí comeza a foz do río Miñor, unha marisma de gran riqueza ecolóxica.
Baiona - A Ramallosa
A Ramallosa- Nigrán
Entramos no municipio de Nigrán. O Camiño regálanos fermosas mostras de arquitectura popular, históricos pazos e cruceiros coma os de Mallón e O Pereiro. En Panxón atopamos o Templo Votivo do Mar, obra de Antonio Palacios, e un arco visigótico do século VII. Toda esta etapa ofrécenos belas praias, de area fina e branca, e un clima benigno case todo o ano.
Seguimos polos coñecidos como Camiño do Souto e Camiño da Rosiña, ata alcanzar o núcleo de Nigrán. Os pazos de Urzáiz e Cea preceden a subida ao monte de Sanromán, que culminamos para chegar a Priegue, aínda no municipio de Nigrán.
A estrada comarcal 550 será unha presenza constante en toda a nosa ruta. Por ela entramos no municipio de Vigo, a maior cidade de Galicia —con preto de 300.000 habitantes e medio millón toda a área metropolitana—, gran porto pesqueiro e de colectores, urbe dinámica e industrial e rodeada de belas praias e de fermosas paisaxes.
A Ramallosa - Nigrán
Nigrán- Coruxo
Saiáns, co seu magnífico areal, marca a entrada no municipio vigués. Tras ela, as parroquias de San Miguel de Oia e San Salvador de Coruxo.
Nigrán - Coruxo
Coruxo- Vigo
Continuamos polo Camiño de Muíños ata a praia de Samil. Este areal é o lugar de encontro e lecer de moitos vigueses. Dispón de abundante oferta hostaleira e de servizos. A mellor opción para entrar na urbe é seguir, augas arriba, a canle do río Lagares, que desemboca aquí. O seu paseo fluvial permitiranos gozar dos seus humidais, da súa flora e da súa fauna. Unha alternativa a esta ruta —máis fiel á tradición, pero hoxe deturpada polas grandes urbanizacións e polo exceso de tráfico— é a que atravesa o barrio de Coia ata As Travesas.
