O Camiño de Santiago é unha opción sempre construtiva, onde cada persoa logra, dalgún xeito, resituarse, relativizar e volver avaliar a súa propia existencia. Neste sentido, é moi significativo que, en 2021-22, 127 persoas conseguisen culminar o Camiño en cadeira de rodas. Ao mesmo tempo, isto reflicte o firme compromiso do Goberno galego de abrir o Camiño a todas as persoas, de dar a posibilidade de que todo o mundo poida acometer esta experiencia e de que poida superar calquera límite ou atranco que pareza imposible de salvar.

Do mesmo xeito ca calquera adulto, os pequenos han de tomar conciencia de que esta experiencia lles esixirá un rendemento. E igual que é necesaria unha adecuada preparación para velos camiñar cunha (pequena e moi lixeira) mochila, tamén é fundamental planificar etapas máis curtas en función da idade dos nosos novos peregrinos.

O Camiño con animais de carga/transporte e/ou mascotas pode ser tan pracenteiro coma complicado. Cómpre salientar que non se admiten mascotas na Rede Pública de Albergues do Camiño de Santiago en Galicia. Pero, aínda así, é habitual ver que as persoas vaian acompañadas de animais e incluso hai quen peregrina en transportes singulares.

É aconsellable facer esta viaxe só co necesario e indispensable, e sempre en función do tempo previsto e da estación do ano na que o abordemos. Ademais, é preciso ter sempre un comportamento cordial e sen urxencias, cun apracible sentido común que nos faga partícipes desta grande experiencia, pois o Camiño sempre foi unha das mellores escolas de civismo, valores humanos e entendemento posibles.