O Camiño de Santiago

Turismo de Galicia, a través da S.A. de Xestión do Plan Xacobeo, inaugurará o próximo venres día 21 de marzo na localidade de Castuera (Badaxoz) a exposición fotográfica O Camiño de Santiago, unha visión dende Oriente,  do fotógrafo xaponés Tomohiro Muda.  

A inauguración terá lugar na Casa da Cultura, na rúa Gabriel y Galán da vila e permanecerá ata o 31 de marzo.  O horario de visitas será todos os días de 18 a 21 horas.  Na organización colabora o concello de Castuera e a Asociación de Amigos del Camino Mozárabe de Santiago de Badaxoz. 

Tomohiro Muda é un fotógrafo xaponés que peregrinou dúas veces a Santiago de Compostela fotografando o Camiño e ofrecendo así a súa propia visión por medio dunha exquisita colección de fotografías realizadas nun expresivo branco e negro.  Muda declárase amante do románico francés e sobre todo do español, de Santiago de Compostela e da peregrinación xacobea.  

Tomohiro Muda naceu en 1956 na Prefectura de Nara, en Xapón. En 1982 empezou a súa carreira como fotógrafo independente. En 1988 presentou a súa primeira exposición, A Terra de Sherpa, con fotografías realizadas na localidade de Sherpa, no Himalaia.  Máis tarde viaxou  por todo o mundo tomando imaxes de arte xaponesa, románica e bizantina, así como tamén de ruínas budistas e pintura rupestre china, no Borobudur, Angkor e Ajanta. Estas reuníronse baixo o tema Espazos de oración, formas de oración, en exposicións fotográficas e  publicacións.

+info: www.xacobeo.es