O Camiño de Santiago

• O vicepresidente primeiro, Alfonso Rueda visitou esta mañá co alcalde de Soutomaior, Agustín Reguera o acondicionamento da contorna do centro de saúde
• Alfonso Rueda indicou que este é un enclave singular do Camiño Portugués, un dos que máis está a medrar nos últimos anos en número de visitantes, de aí a importancia da obra
• O obxectivo foi mellorar a mobilidade e a seguridade na contorna do centro de saúde recuperando un espazo para os veciños, pero tamén un área de descanso para os peregrinos, así como mellorar tamén o alumeado público

Soutomaior (Pontevedra), 4 de xaneiro de 2022

O vicepresidente primeiro, Alfonso Rueda, acompañado do alcalde de Soutomaior, Agustín Reguera e da delegada territorial da Xunta en Vigo, Marta Fernández-Tapias, visitou hoxe o acondicionamento da contorna do Centro de Saúde para uso da veciñanza e zona de descanso dos peregrinos do Camiño Portugués.

Alfonso Rueda explicou que obras como a levada en Soutomaior se encadran no obxectivo da Xunta de ter todo perfectamente preparado neste Xacobeo para aproveitar os recursos da nosa comunidade e facer da recuperación de Galicia un fito e un exemplo de xestión.

A obra realizada neste concello pontevedrés contou cunha axuda de 130.00 euros e ten como obxectivo mellorar a mobilidade e a seguridade na contorna do centro de saúde para recuperar un lugar de uso colectivo e encontro social, así como mellorar tamén o alumeado público. Recuperando un espazo para os veciños, pero tamén un área de descanso para os peregrinos, nun enclave singular dentro do Camiño Portugués, que é un dos que máis está a medrar nos últimos anos en número de visitantes.

Acondicionar os Camiños, elaborar protocolos para os albergues, poñer en marcha a campaña Camiña a Galicia, promocionar o Camiño e Galicia como destino seguro e activar o seguro coronavirus foron algunhas das medidas postas en marcha que deron tan bo resultado como así o confirman os datos.

“Fomos a CCAA na que mellor se recuperou o turismo, no verán chegamos a cifras similares ás da prepandemia, o Camiño recuperouse por riba do previsto, case con 180.000 peregrinos no 2021 e a agora, cos deberes feitos, agardamos recuperar este ano o turismo internacional”, precisou Alfonso Rueda.