O Camiño de Santiago

• O vicepresidente primeiro, Alfonso Rueda, inaugurou na Cidade da Cultura o encontro telemático internacional “Preparados para o Xacobeo 2021-2022. Camiño a Galicia, Camiño seguro”
• O foro reuniu a expertos, asociacións de Amigos do Camiño e comunidades galegas no mundo para debater sobre as medidas adoptadas para a reactivación do turismo e do Xacobeo no contexto da crise sanitaria

Santiago de Compostela, 20 de marzo de 2021

 O vicepresidente primeiro, Alfonso Rueda, inaugurou hoxe a webinar Preparados para o Xacobeo 2021-2022. Camiño a Galicia, Camiño seguro, un encontro telemático que reuniu a expertos, asociacións de Amigos do Camiño e comunidades galegas no mundo para debater sobre as medidas adoptadas para a reactivación do turismo e do Xacobeo no contexto da crise sanitaria.

No foro internacional déronse a coñecer as medidas adoptadas pola Xunta neste último ano, tanto para axudar e preparar o sector coa finalidade de garantir a seguridade dos visitantes, como para atraer turistas baixo o lema Galicia, destino seguro. Con ese obxectivo puxéronse en marcha iniciativas como o seguro coronavirus, axudas para a mellora das infraestruturas, cursos de formación para o sector, actuacións nos albergues e inversións nos itinerarios para que os que queiran viaxar con garantías elixan Galicia e o Camiño de Santiago.

O encontro tivo lugar na Cidade da Cultura, cunha parte dos participantes presentes no recinto e outra parte intervindo online para garantir as medidas de seguridade ás que obrigan as circunstancias sanitarias. Logo da proxección do vídeo promocional do Xacobeo, celebráronse mesas redondas e debates sobre as medidas de seguridade no Camiño, o voluntariado e o espírito de acollida no Xacobeo, a hospitalidade tradicional dos mosteiros e a adaptación da programación ás novas circunstancias, entre outros temas.

O vicepresidente primeiro da Xunta destacou durante a súa intervención a importancia de “fomentar a mensaxe de Galicia como destino seguro para aportar un plus de tranquilidade e confianza aos viaxeiros de todo o mundo”. Nesta liña, destacou o traballo da Xunta nestes meses para ter todo listo para recibir a peregrinos e turistas cun destino e un Camiño seguros.

Na webinar participaron expertos, asociacións de Amigos do Camiño e comunidades galegas espalladas por todo o mundo. Nos relatorios interviron, entre outros, o director xeral de Emerxencias e Interior, Santiago Villanueva, e o director de Administración e Relación coas Asociacións do Camiño de Santiago da SA Xacobeo, Ildefonso de la Campa. A clausura correu a cargo da directora da Axencia Turismo de Galicia, Nava Castro.