O Camiño de Santiago

A Oficina de Acollida ao Peregrino rexistrou entre o 1 de xaneiro e o 1 de marzo un total de 3.070 peregrinos que recolleron a Compostela tras teren percorrido 100 quilómetros dalgunhas das rutas xacobeas. Isto supón que nos dous primeiros meses de 2016 se superou a cifra rexistrada no último ano santo, o de 2010, cando o total dos peregrinos chegou neste período de tempo a 2.832.

En xaneiro e febreiro deste ano, en comparación co mesmo período de 2015, o número de peregrinos experimentou unha suba do 8,61%, coa chegada de 241 peregrinos máis que entre o 1 de xaneiro e o 1 de marzo do ano pasado.

Nos dous primeiros meses do ano chegaron a Compostela 1.269 peregrinos procedentes do territorio español, isto é, o 41,74% do total.

Pola súa banda, os estranxeiros acadaron a cifra de 1.771, o que representa o 58,26% do total dos peregrinos que chegaron a Santiago neste período.

Por camiños, as cifras de peregrinos rexistradas neste período foron as seguintes: 2.057 no Camiño Francés, que segue a ser a ruta máis transitada; 505 no Camiño Portugués; 177 no Camiño Inglés; 104 no Camiño Primitivo; 85 no Camiño do Norte, 83 na Vía da Prata, 13 na Ruta Muxía-Fisterra, 13 no Camiño de Inverno e 2 noutros camiños.