O Camiño de Santiago

• Puxo en valor o coñecemento interdisciplinar para seguir potenciando a alianza de Galicia co resto de Europa

Santiago de Compostela, 20 de febreiro de 2022

O director de Turismo de Galicia, Xosé Merelles, participou esta tarde no acto oficial de apertura do curso 2026 da Academia Xacobea, onde salientou o traballo constante e clave da entidade no estudo, promoción e difusión do fenómeno xacobeo especialmente este ano, “antesala do vindeiro Ano Santo Compostelán e da celebración do Xacobeo 2027”.

Xosé Merelles subliñou a importancia do coñecemento interdisciplinar como un instrumento para “seguir unindo a Galicia dos camiños de Santiago co resto de Europa”, e no caso da Academia Xacobea para “resaltar a importancia da cultura xacobea en aspectos tan relevantes como o ensaio académico, a literatura e a arte”.

Así, referiuse aos encontros, debates e publicacións que promove a Academia Xacobea como “oportunidades ben aproveitadas para resaltar unha historia cultural, a xacobea, cun enorme potencial civilizador”.

Neste sentido, puxo o acento na colaboración da Academia coas universidades galegas, así como coa sociedade civil, as asociacións de amigos do Camiño e a Igrexa de Santiago.

Finalmente, o director de Turismo de Galicia tamén aludiu á transformación social derivada do fenómeno xacobeo que coa “chegada anual de centos de milleiros de peregrinos fortalece os valores derivados del e promove tamén un venturoso desenvolvemento sostible en vilas, aldeas e cidades”.