O Camiño de Santiago

• O director de Turismo de Galicia reiterou hoxe a petición do Goberno galego ante este órgano dependente do Goberno central a través do Ministerio de Cultura
• Recorda que os trámites do Goberno central están “freando un procedemento e unha ferramenta clave e eficaz para a participación de empresas privadas no evento”
• Durante o encontro, as comunidades autónomas aprobaron o logotipo proposto pola Xunta para esta celebración, que será ratificado no pleno proximamente

Santiago de Compostela, 11 de febreiro de 2026

O director de Turismo de Galicia, Xosé Merelles, urxiu hoxe novamente ao Goberno de España a necesidade de que active “canto antes” o programa de beneficios fiscais para as empresas que apoien o Xacobeo 2027, un trámite “que está bloqueado polos trámites do Goberno central, tempo no que a Xunta leva reiterando a súa gran preocupación”. Así o indicou na reunión da Comisión Executiva do Consejo Jacobeo.

Reivindicou o traballo insistente do Goberno autonómico reclamando esta ferramenta “clave e eficaz” para incentivar a participación de empresas privadas e a previsión da Xunta desde o primeiro momento, respondendo “en tempo e forma” ás peticións de documentación do Consejo Jacobeo para activar os mecanismos necesarios e tamén “a anticipación da Xunta elaborando a proposta de logotipo e o manual de exencións fiscais, que xa está preparado para cando se active a ferramenta”, expresou.

De feito, a aprobación do logotipo do Xacobeo 2027 e o manual de uso de exencións fiscais, foi un dos puntos da orde do día da xuntanza de hoxe. Trátase de documentos elaborados desde a Xunta de Galicia que hoxe foron aprobados por todas as comunidades autónomas representadas no Consejo Jacobeo para que sexa ratificado no pleno que se convocará proximamente.

“Sen dúbida, é un paso moi significativo, pero cabe salientar que o Consejo Jacobeo debe axilizar toda a tramitación para favorecer a colaboración público-privada de cara a elaboración da programación do Xacobeo 2027”, afirmou Xosé Merelles.