O Camiño de Santiago

• Nava Castro participou na inauguración das I Xornadas Internacionais sobre este itinerario que se están a celebrar estes días no concello coruñés de Oroso
• Recordou a aposta da Administración autonómica por impulsar esta ruta, na que o seu departamento inviste 1,4 millóns de euros

Santiago de Compostela, 5 de outubro de 2017

A directora de Turismo de Galicia, Nava Castro, valorou hoxe o papel do Camiño Inglés como un dos expoñentes da crecente multiculturalidade e internacionalización que está a vivir nos últimos anos o Camiño de Santiago ao recordar o papel histórico deste itinerario para atraer a peregrinos de lugares como Suecia, Noruega, Dinamarca, Finlandia ou Islandia.

Unha herdanza que, como indicou, está a continuar nos nosos días cando están a vir peregrinos de máis de 177 nacionalidades “unhas cifras que nos enchen de ledicia e constatan a vitalidade da peregrinación, máis internacionalizada e diversificada que nunca”, expresou a directora de Turismo.

Nava Castro fixo estas declaracións na inauguración do I Encontro Internacional do Camiño Inglés que se está a celebra estes días no Concello de Oroso, coa presenza de numerosos expertos e profesionais na materia.

Na súa intervención, a responsable de Turismo da Xunta recordou o compromiso do seu departamento con este itinerario, plasmado no Plan director e estratéxico do Camiño de Santiago polo que este ano 2017 está dedicado a este itinerario xacobeo.

Compromiso coa ruta

Ademais, recordou algunhas das actuacións levadas a cabo nesta ruta referidas á sinalización, rehabilitación e melloras, a posta en marcha de novos albergues como O Poulo ou os de Betanzos e Carral anos atrás, coa intención de fortalecer a acollida dos peregrinos. Tamén se referiu a accións de divulgación como o ciclo de artes escénicas Vive o Camiño, que este verán percorreu os 18 concellos do Camiño Inglés enchéndoos de música e teatro. Un conxunto de actuacións que, como recordou, está a desenvolver a Xunta de Galicia cun investimento de 1,4 millóns de euros.

“Son actuacións que seguen o traballo do que xa fixemos en anos anteriores no Camiño Francés, no Camiño do Norte e no Camiño Primitivo e que promoveremos tamén no resto de itinerarios”, salientou Nava Castro.