O Camiño de Santiago

• A Ruta Xacobea preséntase estes días no certame de turismo relixioso máis importante de Latinoamérica
• O número de peregrinos brasileiros desde xaneiro ata agora medraron máis dun 16% en relación ao mesmo período do ano anterior
• Turismo de Galicia manterá 25 citas cos operadores europeos máis importantes do turismo de negocios europeo

Santiago de Compostela, 10 de xuño de 2017

A oferta turística galega relacionada co Camiño de Santiago e o turismo de negocios ten esta fin de semana dúas citas internacionais nas feiras Expocatólica de São Paulo e Confecblue, na cidade malagueña de Marbella.

No ámbito da Ruta Xacobea, o departamento de Turismo da Xunta conta cun recinto de 24 metros cadrados para difundir os valores do Camiño de Santiago entre os asistentes ao certame, tanto público xeral como operadores turísticos especializados.

Trátase da feira especializada en turismo relixioso máis importante de Latinoamérica e que se desenvolve en Brasil, un pais do que Galicia recibiu o ano pasado 4.113 peregrinos, e no que vai de ano máis de 1.800, o que supón un incremento de máis do 16% en relación ao mesmo período do ano anterior.

Turismo de negocios

Por outra parte, Turismo de Galicia continúa co programa anual para a promoción da oferta de turismo de negocios da Comunidade galega ao longo de 2017 coa participación no workshop ConfecRBlue que remata mañá en Marbella (Málaga).

Deste xeito, durante catro días, representantes do departamento de promoción turística da Xunta de Galicia manterán 25 xuntanzas de traballo con outros tantos operadores turísticos especializados ao obxecto de difundir e apoiar a comercialización dos recursos galegos relacionados cos congresos, as convencións e as reunións de empresa.

O evento ConfecBlue 2017 reúne aos principais axentes europeos especializados na compra de viaxes relacionados co turismo de negocios aos que Turismo de Galicia presenta as posibilidades que ofrece a Comunidade galega nesta modalidade turística.