O Camiño de Santiago

O xerente do Xacobeo, Rafael Sánchez, participa hoxe no I Encontro Internacional sobre o Patrimonio dos Camiños de Santiago que se celebra na histórica vila asturiana de Grao, situada no Camiño Primitivo.

O evento está organizado pola F.I.C.S. (Fraternidade Internacional do Camiño de Santiago), que preside a italiana Carmen Pugliese, e contará coa participación, entre outras autoridades, dun representante de Icomos, organismo de defensa do Patrimonio pertencente á Unesco.

Así mesmo, acudirán ao encontro expertos e representantes das asociacións de peregrinos de Francia, Portugal, Bélxica, Brasil, Estados Unidos, Italia e España así como hospitaleiros do Camiño, xa que un dos alicerces do encontro será a defensa da hospitalidade tradicional do Camiño de Santiago como patrimonio inmaterial inherente á peregrinación en toda época.

O obxectivo do foro é reflexionar e poñer de manifesto posibles agresións ao patrimonio e aos trazados dos Camiños de Santiago. Ademais, as xornadas acollerán a presentación da primeira aplicación online en tempo real para a denuncia das agresións patrimoniais e incidencias no trazado da Ruta Xacobea. Con este instrumento dixital os propios peregrinos poden enviar as súas informacións, datos e fotos de todas as irregularidades que atopen no seu camiño relacionadas coa alteración da sinalización, a construción ilegalmente ao bordo do Camiño ou a falta de respecto no que se refire a contorna natural e ecolóxica.

No panel de conferencias durante estas xornadas cóntase con personalidades como Maria Josefa Sanz Fontes, catedrática de Ciencia e Técnicas Historiográficas da Universidade de Oviedo, Miguel Ángel Cajigal, historiador pola Universidade de Santiago e membro dos equipos delimitadores dos Camiños Norte, Inverno e Portugués, e o profesor universitario lucense Ricardo G. Polin, pioneiro na investigación do Camiño Primitivo en Galicia.