O Camiño de Santiago

O conselleiro de Economía, Emprego e Industria, Francisco Conde, destacou esta tarde o importante papel do Camiño de Santiago como dinamizador turístico e económico, de xeito especial en localidades do rural como A Fonsagrada, un concello que conta cun importante patrimonio natural e cultural.

Conde, acompañado polo xerente do Xacobeo, Rafael Sánchez, visitou na localidade lucense as instalacións de Casa Pasarín, onde se ubicará un Centro de Atención e Albergue de Peregrinos. Alí lembrou que o recoñecemento do Camiño Primitivo como Patrimonio Mundial en 2015 permite que cada vez máis xente se anime a coñecer a zona, o que contribuirá á creación de emprego e riqueza e á fixación de poboación.

Neste sentido, segundo os datos da Oficina do Peregrino, o ano pasado percorreron o Camiño Primitivo 11.428 persoas, preto dun 40% máis que no ano anterior, e no que vai de 2016 superouse xa a cifra de 10.000 peregrinos, sendo a cuarta Ruta Xacobeo máis transitada.

Tal e como sinalou o conselleiro na súa visita, o Camiño Primitivo, que é o itinerario utilizado polos primeiros peregrinos a Santiago de Compostela, destaca polo seu alto valor natural e por percorrer paisaxes cheas de beleza e que conservan numerosos bens de alto valor patrimonial. Entre eles, atópase Casa Pasarín, ou Palacio de Penamaría, un edificio catalogado que se sitúa en plena zona vella da Fonsagrada.