O Camiño de Santiago

A Xunta de Galicia, a través da S.A. de Xestión do Plan Xacobeo, acude á feira Vitrina Turística organizada en Bogotá pola ANATO (Asociación Colombiana de Axencias de Viaxe e Turismo) entre os días 29 de febreiro e 2 de marzo.  Esta feira turística celebra a súa XXXI edición e nela participan 700 empresas de 30 países que ocupan unha superficie expositiva de 12.000 m2, en Corferias, Centro Integral de Negocios e Exposicións da capital colombiana.

O Xacobeo acude por segundo ano consecutivo a esta cita dentro do stand de Turespaña e coa Oficina Española de Turismo de Miami,  pois precisamente unha das particularidades desta feira é que funciona como punto de encontro de axencias de viaxes e turoperadores do sur de EEUU e dos países latinoamericanos.  Estes países están a aportar un bo número  de peregrinos ao cómputo total dos que contabiliza a Oficina do Peregrino do Arcebispado de Santiago de Compostela.  Mentres que Estados Unidos ocupou tanto no Ano Santo de 2010 como no pasado de 2011 a sexta praza por nacionalidades, con 3.334 e 3.726 peregrinos respectivamente,  Brasil,  o primeiro país latinoamericano da lista, figurou no 2010 en oitavo lugar con 2.121 e no 2011 no undécimo con 1.983.