O Camiño de Santiago

• A Xunta acordou esta medida tras as inspeccións realizadas por técnicos do Xacobeo e por unha empresa externa que o recomendan nos dous casos

Santiago de Compostela, 5 de setembro de 2025

Turismo de Galicia vén de acordar o peche cautelar do Albergue de Peregrinos ‘Andrés Fernández García’ de Carril, en Vilagarcía de Arousa, tras certificar o desprendemento dunhas porcións de forxado do teito do establecemento.

A Xunta acorda cautelarmente esta medida despois de que os técnicos do Xacobeo revisasen as instalacións e tamén o fixese unha empresa externa especializada. Nos dous casos e a falta do informe definitivo por parte desta empresa, recoméndase o seu peche para evitar calquera tipo de perigo para os usuarios e así garantir a seguridade dos usuarios.

Prevese que este peche sexa provisional mentres non se reciba o informe definitivo da empresa externa que será o que determine as medidas reparatorias necesarias para garantir unha apertura e un funcionamento seguro das instalacións.

O inmoble foi cedido polo Concello de Vilagarcía de Arousa o pasado mes de marzo e foi necesario, por parte de Turismo de Galicia, dotalo de material e dar de alta os distintos servizos para a súa posta en funcionamento.