O Camiño de Santiago

O titular do Goberno galego, Alberto Núñez Feijóo, subliñou este mediodía que, coa primeira peregrinación da Antártida a Santiago, hoxe pode afirmarse “con propiedade” e por “primeira vez na historia” que “todos os camiños conducen a Compostela”.

Así o sinalaba o máximo responsable autonómico no acto celebrado na capital galega con motivo da fin da peregrinación desde a Antártida na que participaron membros da Federación Española de Asociaciones de Amigos del Camino de Santiago, membros do Instituto Geográfico Nacional, científicos antárticos, militares da dotación do Buque de Investigación Oceanográfica ‘Hespérides' e da XXIX Campaña Antártica do Exército de Terra.

Alí, Feijóo destacou que, nun contexto no que existe unha certa tendencia á disgregación e ao cuestionamento dos proxectos comúns, este grupo de "pingüirinos” demostraron que a forza segue a estar baseada na unión.

Verbo disto, e establecendo un paralelismo, destacou que, se na Antártida, “esa utopía existente”, traballan unhas nacións unidas polo afán de investigación e progreso, “en Compostela uníronse as nacións para prefigurar esta Europa que nos fai máis libres e fortes”.

Con respecto a isto, Feijóo tamén fixo referencia á ensinanza que se pode extraer da historia, asegurando que a liberdade, a democracia e mais a convivencia teñen un prezo en forma de seguridade. E España, proseguiu, “é un país libre porque ten garantida a súa seguridade grazas a uns militares capacitados e entregados ao seu deber”.

O presidente da Xunta tamén indicou que o distanciamento xeográfico non impide que haxa un fondo achegamento a unha terra inhóspita, avistada antes ca ninguén polo navegante español Gabriel de Castilla, que se converteu “nun exemplo de cooperación internacional”, dixo.

Por último, Feijóo agradeceulles a todos os participantes no proxecto desta peregrinación “por traernos desde a Antártida o voso compromiso e a vosa determinación”. Así como tamén amosou o seu agradecemento ás máis de 300 asociacións de amigos do Camiño de Santiago, pola súa contribución á difusión e prestixio das distintas rutas xacobeas. Esta colaboración, indicou, tradúcese na chegada crecente e incesante de peregrinos.