O Camiño de Santiago

A S.A. de Xestión do Plan Xacobeo participará o próximo sábado 1 de outubro en Washington na reunión científica “Workshop on Pilgrimate Studies”, encontro no que se abordará o fenómeno das peregrinacións e o Camiño de Santiago en particular.

A organización deste evento corre a cargo da propia S.A. de Xestión do Plan Xacobeo, en colaboración coa Biblioteca do Congreso de Estados Unidos, a embaixada española en Washington, o American Film Institute e o William and Mary College de Virxinia. A directora xerente da S.A. do Plan Xacobeo, Camino Triguero, participará nesta xornada, na que manterá contactos cos responsables da Biblioteca do Congreso para establecer vías de colaboración entre ambas entidades.

O “Workshop on Pilgrimate Studies” contará coa presenza de máis de 40 centros universitarios de Estados Unidos e Canadá, algúns deles considerados entre os cen mellores do mundo, como a Universidade de California-Os Ánxeles, Purdue University, Universidade de Michigan, Universidade de Florida, Washington University of Saint Louis, Universidade de Minnesota ou a Fordham University. Estes centros forman parte dun consorcio de universidades que están a desenvolver un plan de estudos sobre o Camiño de Santiago e o fenómeno das peregrinacións en xeral, dotando de rango curricular ás investigacións e experiencias sobre a Ruta Xacobea en diferentes campos, tales como relixión, estudos hispánicos, a antropoloxía, historia da arte, historia medieval ou socioloxía. O consorcio proponse organizar para os seus alumnos un primeiro seminario de investigación, que terá lugar en Santiago entre o 21 de maio e o 29 de xuño de 2012. 

No marco do “Workshop on Pilgrimate Studies” presentarase e proxectarase aos asistentes e á prensa de Washington a película "The Way", rodada no Camiño de Santiago coa colaboración da Xunta de Galicia e que durante estes días estase a estrear nos Estados Unidos.  Á presentación acudirán o director Emilio Estévez e o protagonista, seu pai, Martin Sheen, ambos os dous de orixe galega.