O Camiño de Santiago

• O director da S.A Xacobeo inaugurou a mostra Compostela vs Testimonium. 100 quilómetros de peregrinación, que se poderá visitar ata o 15 de xaneiro de 2025

Santiago de Compostela, 7 de novembro de 2025

O director da S.A Xacobeo, Ildefonso de la Campa, inaugurou este venres a exposición Compostela vs Testimonium. 100 quilómetros de peregrinación. Esta mostra recolle máis de 50 obras orixinais do pintor italiano Barnaba Salvador e do ilustrador galego Pablo Rosendo, que reflicten as súas experiencias de peregrinacións.

En concreto, Rosendo realizou os últimos tramos do Camiño Francés, desde Sarria ata Santiago, mentres que Salvador fixo a Via Francígena -que en 2025 celebra ano xubilar- desde Viterbo ata Roma. Os dous artistas camiñaron cen quilómetros, co que conseguiron, respectivamente, a Compostela e o Testimonium. De aí o nome da mostra, na que se poderán ver as máis de 50 obras realizadas durante cada traxecto, así como caixas de luz, fotografías dos itinerarios, bosquexos e recordos do Camiño.

A mostra poderá visitarse no Museo das Peregrinacións e de Santiago ata o 15 de xaneiro de 2026. Enmárcase no Encontro Internacional de Cadernos de Viaxe Compostela Ilustrada, dentro do que, desde 2018, Turismo de Galicia organiza unha exposición. O pasado ano púidose desfrutar de O Camiño en Viñetas, de Fausto Isorna, prevista inicialmente ata o 14 de xaneiro deste ano e que tivo que ser prorrogada ata o día 30 de marzo debido ao éxito de afluencia.

O director da S.A Xacobeo puxo en valor “a conexión entre ambos itinerarios no que se refire tanto á espiritualidade como ao vínculo a nivel turístico”. No que vai de ano, arredor de 520.000 persoas recolleron a Compostela, un 6% máis que no mesmo período de 2024. Un 57% veñen de fóra de España, o que indica a importancia do Camiño de Santiago á hora de internacionalizar o turismo.