O Camiño de Santiago

• O director de Turismo de Galicia inaugurou en Negreira o II Foro de Internacionalización do Camiño Fisterra-Muxía

Santiago de Compostela, 14 de decembro de 2024

O Camiño de Fisterra Muxía medrou no que vai de ano a un ritmo do 27%. Ao mesmo tempo, os últimos datos turísticos feitos públicos polo Instituto Nacional de Estatística (INE) destacan que a Costa da Morte recibiu 161.461 viaxeiros que fixeron 324.721 noites nos establecementos de aloxamento dos distintos concellos, acadando uns incrementos do 4,9% e 1,3% respectivamente. Así o puxo de manifesto o director de Turismo de Galicia, Xosé Merelles, na inauguración esta mañá en Negreira do II Foro de Internacionalización Camiño Fisterra-Muxía.

Precisamente, Xosé Merelles destacou os datos do mercado internacional salientando que o 42% dos peregrinos que fixeron este roteiro foron estranxeiros chegados sobre todo de Portugal, Italia e Estados Unidos.

En canto aos datos turísticos xerais, o incremento entre xaneiro e outubro do mercado internacional foi do 16,1% en noites e do 16,4% en viaxeiros neste xeodestino. “É a primeira vez que o segmento dos estranxeiros acada as 90 mil noites nos hoteis e pensións do destino”, salientou.

Finalmente, o director de Turismo de Galicia referiuse ao bo comportamento deste destino na estratexia de desestacionalización que vén desenvolvendo o seu departamento co incremento rexistrado no mes de marzo polo efecto positivo do calendario coa Semana Santa. “Esta realidade avala toda a nosa aposta”, dixo ao tempo que lembrou os incrementos salientables en xeral en toda a Comunidade nos meses de febreiro (+1,4%), maio (+15%) e setembro (+2,8).