O Camiño de Santiago

• A directora xeral de Relacións Institucionais e Parlamentarias, Blanca García-Señoráns, participou na inauguración do evento, onde tamén puxo en valor as rutas xacobeas como elementos dinamizadores da oferta cultural e turística de Galicia

Santiago de Compostela, 5 de outubro de 2022

A directora xeral de Relacións Institucionais e Parlamentarias, Blanca García-Señoráns, destacou hoxe os valores espirituais que ofrece o Camiño de Santiago durante a súa intervención na inauguración esta tarde do VIII Congreso Mundial de Pastoral de Turismo. No acto tamén participou o arcebispo da Catedral de Santiago, monseñor Julián Barrio, e contou coa presenza da directora de Turismo de Galicia, Nava Castro.
 
Neste sentido, puxo en valor que o Camiño ofrece cultura, patrimonio, paisaxe e hospitalidade; ademais dunha meta espiritual para moitas persoas que o percorren. De feito, trátase do primeiro itinerario cultural europeo converténdose na meta da peregrinaxe europea e símbolo de unión entre as diferentes culturas.

Blanca García-Señoráns sinalou ademais o papel do Camiño de Santiago como evento dinamizador da demanda cultural e turística de Galicia e o traballo levado a cabo desde a Xunta neste Xacobeo 21-22 para contribuír á recuperación económica e turística da comunidade. Así o demostran as cifras con récord de peregrinos neste ano e os bos resultados de visitantes atraídos polo turismo seguro, de calidade e sostible cunha oferta diversificada que puxo de moda a Galicia como destino turístico.