O Camiño de Santiago

• Os traballos benefician aos dez concellos polos que discorre o epílogo da ruta xacobea, grazas a un proxecto cofinanciado ao 80 por cento con fondos Feder
• O delegado territorial na Coruña, Ovidio Rodeiro, evocou o interese dos primeiros peregrinos por continuar a ruta do sol e chegar, alén de Santiago, á fin da terra

Santiago de Compostela, 20 de novembro de 2017

O delegado territorial da Xunta na Coruña, Ovidio Rodeiro, visitou esta mañá as obras para a mellora, acondicionamento e sinalización do Camiño Fisterra-Muxía que se están a levar a cabo en diferentes tramos, e nas que a Xunta de Galicia inviste preto de 760.000 euros. Trátase dun proxecto cofinanciado ao 80 por cento polo Fondo Europeo de Desenvolvemento Rexional no marco do programa operativo Feder Galicia 2014-2020.

O Camiño de Fisterra–Muxía, discorre dende Santiago de Compostela ata Fisterra e Muxía, ao longo de 148,08 quilómetros, sendo a única ruta con orixe en Santiago. A súa meta é Fisterra ou Muxía, calquera dos dous, lugares de gran simbolismo e vinculacións xacobeas onde outrora situábase o fin do mundo coñecido. Divídese nos seguintes catro tramos: Santiago de Compostela-Olveiroa (60,680 quilómetros), Olveiroa-Fisterra (29,020), Olveiroa-Muxía (26,620), e Muxía-Fisterra (31,760). O conxunto do camiño atravesa os concellos de Santiago de Compostela, Ames, Negreira, Santa Comba, Mazaricos, Dumbría, Cee, Corcubión, Muxía e Fisterra. En todos eles están previstas obras de acondicionamento derivadas do proxecto que hoxe visitou o delegado territorial.

O obxecto da actuación é describir e valorar as obras necesarias para acondicionar e mellorar o estado de conservación de varios tramos do Camiño de Fisterra-Muxía. Así mesmo, acométense unha serie de actuacións encamiñadas á mellora da sinaléctica do Camiño, coa intención de completar unha recuperación e potenciación do Camiño de Fisterra-Muxía ao seu paso polos distintos municipios como un recurso cultural, económico, turístico e de comunicación.

Ovidio Rodeiro sinalou que “desde a máis remota antigüidade, todos os pobos e todos os viaxeiros que se achegaron a Compostela sentiron desexos de proseguir a ruta do sol, de chegaren á fin da terra, o último reduto de terra coñecida daquela”, polo que destacou que “o compromiso da Xunta de Galicia coa Costa da Morte “facía de este proxecto, máis que una necesidade, unha obriga”.