O Camiño de Santiago

• A cidade andaluza acolle a mostra audiovisual ‘Camiño de Santiago, experiencia de peregrinación contemporánea’, que realiza un percorrido sentimental por esta ruta
• O xerente de Xacobeo e membros do Comité Internacional de Expertos do Camiño de Santiago e da Cátedra do Camiño e as Peregrinacións participan no encontro
• Turismo de Galicia conmemorará cunha programación especial o 30 aniversario da declaración do Camiño de Santiago como Primeiro Itinerario Cultural Europeo

Santiago de Compostela, 20 de outubro de 2017

Turismo de Galicia participa estes días no XI Congreso Internacional de Asociacións Xacobeas que ten lugar en Antequera (Málaga). A cidade andaluza acolle este encontro trianual que desde hai 30 anos reúne a peregrinos e especialistas no Camiño de Santiago. Galicia, como meta da peregrinación, está presente na cita a través dunha exposición e coa achega de varios relatores nas sesións de debate.

Co título Camiño de Santiago. Unha experiencia de peregrinación contemporánea, a mostra promovida polo Goberno galego reúne unha selección de fotografías e un audiovisual que supón un percorrido sentimental polos distintos itinerarios xacobeos. Asinan esta exposición o fotógrafo Manuel Valcárcel e o músico Alexandro González, que seguen os estímulos máis íntimos dos peregrinos e a súa relación coa natureza e co patrimonio cultural que lles rodea e coas poboación locais que atravesan na súa peregrinaxe cara a Santiago de Compostela.

O congreso, ao que asisten persoas de diversos países e que é organizado pola Federación Española de Asociacións de Amigos do Camiño de Santiago, conta coa presenza do xerente do Xacobeo, Rafael Sánchez, que hoxe participa na mesa redonda Ao pé do Camiño.

Tamén comparten experiencias e coñecementos outros especialistas do Xacobeo, xunto ao presidente do Comité de Expertos do Camiño de Santiago, Paolo Caucci, ou a codirectora da Cátedra do Camiño de Santiago e as Peregrinacións, impulsada entre a Xunta de Galicia, a Universidade de Santiago e a Catedral compostelán, Adeline Rucquoi, que no relatorio de clausura abordará A dimensión europea do Camiño de Santiago desde a súa orixe.

Símbolo da identidade europea

Esta reflexión chega a tres días de que comece o programa de Turismo de Galicia co que se conmemora o 30 aniversario da declaración do Camiño de Santiago como Primeiro Itinerario Cultural Europeo. Esta cita combinará encontros, seminarios e congresos coa asistencia de membros das institucións comunitarias máis relevantes, un concerto de Amancio Prada na Catedral de Santiago e un acto oficial, cheo de simbolismo, que lembrará a profunda achega do Camiño de Santiago como espazo clave na construción da identidade europea.

Proba do seu carácter universal é a diversidade de países presentes na ruta xacobea, pois no que vai de ano contabilizáronse peregrinos de 177 nacionalidades diferentes. Dos máis de 280.000 camiñantes recibidos, cifra récord na historia da ruta, o 55% foron estranxeiros.