O Camiño de Santiago

Hoxe venres, 20 de xullo, ás 20.00 horas, terá lugar no Museo das Peregrinacións de Santiago de Compostela, na Rúa San Miguel número 4, a inauguración da exposición plástica “Por fin Santiago”, do artista asturiano Alfredo González.

A exposición está organizada polo propio museo en colaboración coa Dirección Xeral de Patrimonio e a S.A. de Xestión do Plan Xacobeo e permanecerá ata o 2 de decembro. 

Esta mostra consta de medio cento de debuxos a pluma e lapiceiros de cores de vistas panorámicas da cidade de Santiago reflectida como meta e final do Camiño,  rematando así cun ambicioso proxecto de debuxar a ruta xacobea, a súa meta e os seus valores,  que o artista iniciara mediante unha exposición das mesmas características sobre o Camiño Francés,  no ano 2009 e no mesmo museo. Naquela ocasión, o Xacobeo contribuíu á edición do catálogo con motivo do Ano Santo do 2010. 

Alfredo González é membro destacado da chamada Escola de Madrid. Os seus debuxos de cidades son coñecidos en todo o mundo e xa plasmou urbes como Madrid, Nova Iorque, París, Sao Paulo, Río de Xaneiro, Moscova, Panamá, México D.F., etcétera.