Idioma 
“Protexendo o Camiño” chega ás escolas para difundir os valores xacobeos entre os máis cativos
Turismo de Galicia desenvolverá nas próximas semanas un programa de actividades de difusión do Camiño de Santiago para escolares.
O programa “Protexendo o Camiño” desenvolverase en escolas ou centros culturais de 40 municipios galegos percorridos polos diferentes itinerarios da Ruta Xacobea.
O obxectivo é promover os valores do Camiño e o fenómeno da peregrinación entre os máis cativos dos municipios por onde transcorre a Ruta Xacobea.
“Protexendo o Camiño” contará as aventuras dun neno e unha nena, Iago e Peregrina, debuxante e fotógrafa, que realizan o Camiño de Santiago tentando protexer as rutas dos riscos que poden sufrir –lixo, feísmo, falta de civismo, etc.-
En cada centro os nenos reflexionarán, dun xeito lúdico, sobre a responsabilidade de toda a comunidade coma protectora do Camiño. Así mesmo, identificarán os ricos existentes e propoñerán posibles solucións a estes problemas.
Durante cada acción, os nenos escoitarán un conto, debuxarán e farán diversas actividades e postas en común para entre todos e todas artellar unha rede protectora e cultural do Camiño de Santiago.
As actividades desenvolveranse nas sete rutas do Camiño de Santiago, nun total de 40 municipios galegos, e rematarán na meta da Ruta Xacobea, Santiago de Compostela. A primeira delas terá lugar o día 30 de abril en Ames.