Igrexa Románica do último terzo do s. XII, con reformas posteriores. Da primitiva traza só queda a portada principal e parte do frontis. É de planta de cruz latina con nave rectangular, dúas capelas laterais e presbiterio pentagonal. Os muros son de cachotaría e cadeirado de granito e a cuberta de tella a dúas e catro augas. A portada é románica, con arco de medio punto con dúas arquivoltas de baquetón, escocias e moldura exterior de billetes, e capiteis decorados. O tímpano é liso sobre mochetas. O retablo da capela maior é Neoclásico.