Na área recreativa de Chao do Couso existe unha zona de aparcamento e un panel informativo sobre os carreiros deste concello.

O roteiro transita na súa totalidade por pistas anchas de escasa pendente. O tramo inicial son 300 metros de estrada para logo emprender a subida pola suave Serra da Cadeira cara ao pico de Chao Grande (770 m.) en Cerrochán, desde onde se goza de excelentes vistas dos vales circundantes.

O bosque autóctono de carballos, madroños, acivros e abeleiras predomina na vertente norte, a unha cota inferior á pista por onde discorre a senda. Nas cimas do monte predominan as plantacións de coníferas e os espazos abertos.

O percorrido dispón de dous pequenos refuxios para a choiva en O Chao Grande e no Monte da Insua. Case dous quilómetros do traxecto son compartidos co PR-G 85 Ruta da Fraga de Vilapena e tamén no inicio conecta co PR-G 84.