O Colexio de Santiago Alfeo ou de Fonseca, considerado a orixe da Universidade Compostelá, empeza a funcionar en 1544. Mándao construír o arcebispo Alonso de Fonseca III. É trazado polo arquitecto Juan de Álava e erixido por Alonso de Covarruvias. O patio é obra de Gil de Hontañón. Realizado en cadeirado de granito, a súa fachada é de estilo plateresco con pervivencia de elementos oxivais. Ten dous corpos con varias estatuas góticas nos intercolumnios e nos nichos do friso. As dúas do primeiro corpo representan a Santiago Alfeo e á Virxe María. No centro, o escudo coas cinco estrelas dos Fonseca. Traspasando a porta atópanse a capela gótica e o Salón Artesonado, antigo refectorio do colexio, e onde estivo instalado provisionalmente o primeiro Parlamento autonómico de Galicia.
Edificio propiedade da Universidade de Santiago de Compostela, actual Biblioteca Xeral da Universidade.

Núcleo urbano. Centro histórico.