Igrexa románica do século XII, aínda que o frontis, a ábsida e un dos laterais non pertencen á fábrica orixinal. A ábsida ergueuse en altura ata igualala coa nave. Os muros son de cachotería e cantería de granito, e a cuberta é de tella a dúas augas. Agás nun dos laterais, entre os muros e o tellado dispóñense varios canzorros.

Ten ventá seteira con abucinado interior no testeiro e sobre a porta principal alintelada disponse un tímpano liso. Dentro da edificación consérvase un banco de pedra corrido apegado aos muros y un arco triunfal con dobre arquivolta apoiado sobre columnas de fustes monolíticos, bases áticas e capiteis de ornamentación vexetal sinxela. O frontis remata nunha espadana dun só van.