Construída entre os séculos XVII e XVIII, é de estilo barroco. Ten unha nave de planta basilical con capela maior moi ampla que está cuberta con bóveda de canón de cantería de granito, construída baixo a dirección do mestre canteiro Josphe de Bar. Son dúas capelas pegadas as que enriquecen o espazo litúrxico interior, ao que se lle engade un coro alto de madeira situado aos pés da nave. O arco triunfal é de medio punto e non ten decoración. O retablo maior é de estilo barroco. Unha gran fornela acolle a imaxe de santa Baia que porta a palma do martirio. Neste retablo é moi evidente a influencia do arquitecto Simón Rodríguez, sobre todo no emprego de placas, volutas en forma de C, froitas, etc.

Localízase na mesma poboación. Dende as oficinas municipais do Concello de Dumbría, saír cara á Serra de Outes pola DP-3404; a uns 300 m está a igrexa, á esquerda da estrada.