Presenta fábrica de boa obra románica, da cal conserva a ábsida, e o lateral norte, con porta de arco de medio punto. A nave é ampla e elevada, cuberta a dúas augas. Posteriormente pegáronlle por párea sur un recinto rectangular, que supuxo a apertura de arcos de comunicación e unha sancristía. A ábsida con tramo recto e curvo, cobixa un retablo barroco dun só corpo con tres encasillamentos, ático con fornela e columnas salomónicas con acios. Destacan as imaxes de Santa Eulalia, a Inmaculada, San Pedro e San Benito.