Capela de planta rectangular a partir de muros de cachotería recebados con morteiro de cemento e pintados de branco, cun pequeno soportal na súa fachada principal, revestida de lousa, que se prolonga sobre a espadana, cun só oco con campá e rematada nunha sinxela cruz.

Esta igrexa sitúase nunha contorna rural no lugar do Robledo, considerado un núcleo singular no que se poden observar as características típicas dos asentamentos tradicionais da zona: concentración de construcións con edificacións en medianeira, camiños de ancho reducido, edificacións executadas en cachotería de xisto e adobe, cuberta a dúas augas con remate de lousa sobre armazón de madeira e corredor como elemento permanente ligado ás vivendas.