Pertencía antigamente ao Pazo de Vista Real dos Caamaño, xa desaparecido, e hoxe é de propiedade particular. A disposición é dun único corpo con bóveda de canón, con cuberta a dúas augas. Foi posiblemente reconstruída sobre unha ermida anterior no ano 1625. Na fachada contén os escudos dos Soutomaior, Caamaño e Mendoza. Cóntase que a campá se vendeu a outra capela e aos tres días fendeu, polo que non tocaría máis. 

Dende a praza de Castelao saímos cara á rúa Rosalía de Castro e na rotonda collemos a segunda saída pola estrada DP-3301 cara a Taragoña. Continuamos pola DP-7201 e na seguinte rotonda tomamos a primeira saída pola DP-7202. No lugar do Pazo colleremos un desvío á esquerda, para seguir pola DP-7203, que nos leva a Taragoña. Alí viraremos á esquerda pola AC-305 e a uns 150 m, en Campo de Pasos, collemos á esquerda cara á aldea de Castriño, pasamos o lugar de Senra e a continuación estaremos en Iñobre, onde se atopa a capela.