Axenda de Eventos

Visita guiada/Roteiro
Os espazos naturais do Gaiás
Do 3 xullo ao 29 setembro | Espazos exteriores da Cidade da Cultura Santiago de Compostela
Comeza:
3 xullo | 12:15
Remata:
29 setembro | 13:15
Onde:
Espazos exteriores da Cidade da Cultura Santiago de Compostela

Coñece coa axuda dos nosos guías a xénese, evolución e funcións que se desenvolven na Cidade da Cultura, descubre a espectacular arquitectura de Peter Eisenman, mergúllate nos espazos naturais que rodean o complexo e a fauna e flora que os habita. A través da nosa oferta de visitas comentadas poderás achegarte de xeito ameno e divulgativo a esta singular infraestrutura e gozar de vistas panorámicas de Santiago desde o cumio do monte Gaiás.

Percorrido polas zonas verdes do Monte Gaiás para descubrir dun xeito exprés das máis de 40 Ha de zonas verdes que rodean o complexo arquitectónico, coñecer a súa fauna e a súa flora e deternos nos principais aspectos medioambientais asociados a estes espazos naturais ou recuperados.

Saíndo do Museo Centro Gaiás, achegarémonos brevemente ao Xardín Literario para a continuación percorrer parte dos sendeiros do Bosque de Galicia, o gran pulmón verde do monte, con once mil árbores de especies autóctonas (carballos, castiñeiros, bidueiros, espiños, pradairos, abeleiras, érbedos, freixos, faias…), que incrementa a biodiversidade da zona e mellora o metabolismo ambiental de Santiago, ao tempo que contribúe a integrar a Cidade da Cultura en Compostela.

Coñeceremos o 'horto solar' do complexo e as zonas de lecer infantil do Bosque de Galicia e o Parque da Balea, para rematar o percorrido a carón do Xardín do Teatro, con especies botánicas procedentes de diferentes partes do mundo, un auditorio ao aire libre, estanques e áreas de lecer para gozar do deporte e da natureza.

Tipo de evento: Visita guiada/Roteiro
Entrada: Inscrición previa  |  Entrada de balde