Existen dúas categorías de Embaixador de Honra do Camiño, ambas con carácter vitalicio e exclusivamente honorífico: a categoría a título persoal e a categoría de carácter institucional.

A presentación de propostas de candidatos para o título poderá realizarse ao longo de todo o ano. E os embaixadores comprometeranse a colaborar na programación cultural anual da Xunta de Galicia con, polo menos, unha acción ou actividade para divulgar os valores humanos e sociais, culturais e espirituais do Camiño.

Así mesmo, poderán concederse como máximo oito títulos de embaixador vitalicio en cada categoría, correspondentes ao número das oito rutas históricas do Camiño de Santiago.

A entrega das distincións levarase a cabo no mes de outubro de cada ano e coincidirá co día en que o Camiño foi declarado Primeiro Itinerario Cultural Europeo polo Consello de Europa en 1987.

En todos eles, o Goberno galego recoñeceu a súa especial contribución ao coñecemento e divulgación do Camiño de Santiago en todo o mundo.

Unha das publicacións consolidadas co impulso do Comité de Expertos foi a revista de investigación xacobea Ad limina, cun carácter multidisciplinar e multilingüe e que edita desde 2010 a S. A. de Xestión do Plan Xacobeo (desde 2015, coeditada con Turismo de Galicia).

Así mesmo, o labor do comité permitiu manter en activo centros de estudos xacobeos no estranxeiro, como o Centre d’Etudes Compostellanes de París e o Centro Italiano di Studi Compostellani di Perugia.

Os integrantes, xunto a Paolo Caucci von Saucken, do Comité de Expertos, son Manuel Castiñeiras González, Klaus Herbers, Fernando López Alsina, Adeline Rucquoi, Segundo Leonardo Pérez López e María José Azevedo Santos.